摩連奴帶領皇馬連連報捷，首先兩挫巴塞，然後再於歐聯淘汰曼聯，返到西甲又贏切爾達2比1。皇馬有咁好成績，摩帥應該好滿意，但係一向牙擦擦嘅佢又異常低調。其實，摩連奴有乜大場面未見過呀？率領國際米蘭成為三冠王，佢至興奮到狂奔慶祝，因為嗰種殊榮至有慶祝嘅意義。摩連奴又話，淘汰曼聯係非常重要嘅勝仗，因為咁至有機會爭奪歐聯冠軍，但係到咗8強，皇馬都一樣有機會被其他強隊踢出局。至於下季去向，佢就話從來唔考慮自己，亦唔會因為贏唔贏到冠軍而決定係咪留低，精神只會集中喺球隊嗰度。摩連奴能夠執教咁多強隊，係因為佢全情投入，而且識英雄重英雄。紅魔大戰皇馬之後，佢喺球員通道見到傑斯，都特意走去讚對方，指佢成場比賽嘅水準令人佩服。
