巴塞前線擁有美斯、尼馬及蘇亞雷斯呢個世界最強嘅「MSN」組合，除非有傷，否則3個都肯定係必然正選。阿歷斯山齊士深明此道，上季決定離隊轉投阿仙奴，佢嘅表現非常對辦，成為隊中不可或缺嘅主將，並協助兵工廠捧走足總盃。近日盛傳柏度洛迪古斯會步山齊士後塵，轉戰英超，據悉車路士、曼聯、利物浦同阿仙奴都對佢感興趣。究竟柏度下一站係英超定其他聯賽，遲下自有分曉。
個人認為，柏度技術、速度及把握力俱備，係一位全面嘅前線球員，可惜就好似三國時代嘅周瑜句名言——既生瑜，何生亮。唉，愈講就愈sad，如果我係佢，就一定會離開呢個傷心地，另覓新發展。