森林自焚
今夏英超轉會市場最癲一定係已簽11人嘅升班馬諾定咸森林，升班後未來3季已保證每季起碼有1.35億英鎊收入；但呢筆保證收入話咁快幾乎用晒嚟添兵打英超，玩法同2018年升班後一季玩完嘅富咸極相似。首先倫敦蚊型球會富咸當年一升班，一樣豪花成億英鎊買人，最貴嘅非洲中場占舒利、塞國坦克車阿歷山大米祖域同冇英超經驗中堅艾菲莫臣，事後證明全部係失敗收購；最叻嘅米祖域原來係一部英冠入球機器，毫無英超領軍經驗嘅祖簡奴域，開季4個月後炒魷，最終球隊尾二回降，全季失81球係英超史上最差。今夏直升嘅般尼茅夫同富咸曾受過教訓變低調，但闊別英超23年嘅森林好興奮，但非洲箭頭艾禾尼爾、紅軍右閘尼祖威廉斯、法甲全能後衛比安高尼等等，得個「估」字，神奇領隊谷巴亦冇英超教波經驗；卒之用一年超高薪合約擸埋29歲嘅連格成進攻重心，呢類「三獅兵」鬥心成疑進步已停，反而佢嘅前曼聯隊友、借將門神甸恩軒達臣，可能係今屆森林避免「自焚」嘅真正「救火隊一號」。