歐聯新制水晶球
歐聯改制分組賽踢多2場，暫時只有3支零分球隊，篤定出局；連埋6戰過後最多得3分共有8隊，佢哋就算餘下兩場全勝，要躋身第17至24名嘅淘汰賽最低門檻，相當抆水。意味歐洲5大聯賽代表嘅博洛尼亞、基羅納同RB萊比錫，踢足8場袋走起碼保證1,700多萬歐元嘅出場費，可以收工。新制下參加場數多咗，但每隊每場贏、和波獎金比以往較少，實際得益唔係多好多；反而聯賽下半季要收拾心情追分，呢3隊要冧莊再踢歐聯機會都唔大。頂級足球比賽鬥改制加場數，精兵變傷兵，豬籠入水當然係主辦單位。
前8位以外邊緣隊，包括多蒙特、馬體會、AC米蘭同阿特蘭大上輪聯賽咁橋齊齊輸波，睇嚟決心要喺餘下兩輪分組賽上位。英超世界最強，講緊係市場，實際過咗半季唔少球隊打殘；現時前8佔三席，但剩低回勇嘅曼城就算連贏餘下兩場鬥PSG同布魯日，都好大機會落入稍後附加賽。藍月喺英超畀利物浦放甩，焦點轉跟大賽球隊拜仁、西甲雙雄巴塞、皇馬爭做新制下歐聯王者，可能更實際。