今日黃昏上演兩場日職補賽，論戲碼大阪飛腳主場對鹿島鹿角比較吸引。飛腳上仗作客3比2險勝仙台維加泰後，聯賽加盃賽4場不敗(得3勝1和)，暫列聯賽榜第四位，但只落後榜首大阪櫻花3分，仍有力爭標。飛腳攻力強勁，至今攻入31球，係日職入球第三多球隊，有12位球員先後有士哥，前鋒長澤駿及翼鋒倉田秋表現搶鏡，係一支難以應付嘅強隊。鹿角上仗作客3比2擊敗「二哥」柏雷素爾後，聯賽加盃賽取得6連勝，僅落後櫻花2分，今仗贏波即可上榜首。一對巴西箭頭柏度祖尼亞及韋法臣李安度頻頻有士哥，本土嘅金崎夢生亦有上佳表現。鹿角今季作客認真強勁，至今7戰全勝，係日職嘅作客王。對賽方面，佢哋近6次到訪飛腳，錄得2勝1和3負唔算太輸蝕，只要演出對辦，今仗有望贏波。
