喺洲際國家盃表現不俗嘅巴西門將祖利奧施薩，大有機會加盟拿玻里。由於昆士柏流浪來季降落英冠，為減輕開支，球會將隊中部分主力出售套現。據悉拿玻里已經同昆士柏流浪達成轉會協議，目前只欠施薩喺個人條件方面未落實。有指雙方出現薪酬分歧，施薩要求年薪260萬歐元，但拿玻里只肯支付220萬歐元。其實兩個價錢相差不遠，相信交易最終可以達成。33歲嘅施薩出道於法林明高，05年7月以2,450萬歐元加盟國際米蘭，効力期間合共上陣300次，去年8月轉投昆士柏流浪。施薩係一位反應及身手了得嘅門將，經常勇救險球，演出相當穩定，仲係現時巴西國家隊嘅正選門將，若非昆士柏流浪降班，點都唔會咁易放人。