今晚意甲上演榜首大戰，由羅馬主場硬撼祖雲達斯。羅馬近況不俗，聯賽連續14場不敗(6勝8和)，目前落後祖記9分，要爭奪冠軍，今場非常關鍵。不過，佢哋實在和波太多，近7場聯賽只係贏過卡利亞里，其餘6場全部和波，前鋒拿積狀態時好時壞，老黃忠托迪助攻較多，但入球偏少，加上傷兵較多，未能以強陣出擊。「老婦人」近況相當強勁，聯賽加盃賽連續22場不敗(15勝7和)，穩坐意甲榜首。佢哋今仗有核心派路因傷缺陣，或多或少影響中場創造力，首席射手泰維斯則近況回勇，上仗歐聯亦有進帳，協助球隊擊敗多蒙特。對賽方面，祖記近6次到訪羅馬，錄得3勝1和2負，略為佔優，論近態、實力及往績，可投祖記信心一票。
