有傳利物浦領隊鶴臣睇中咗維拉翼鋒艾殊利楊格，並打算1月出價將佢收歸旗下，不過都要楊格唔同維拉簽新約，呢單交易先有機會落實。紅軍自新老細約翰亨利入主後，財政問題已得到解決，呢位美國班主仲會喺1月開水喉，俾3,000萬英鎊鶴臣去買人。
此外，熱刺領隊哈利列納亦有興趣收購楊格，早在今夏，列納已經想簽入呢位英格蘭翼鋒，但最終未能成事，如今捲土重來，成為紅軍收購楊格嘅攔路虎。楊格成名於屈福特，07年1月以800萬鎊由屈福特轉投維拉，效力期間上陣131次，攻入24球。楊格係一位速度快嘅翼鋒，但略嫌腳法同射術一般，幸好年僅25歲，仍有進步空間，若然加盟紅軍，有助加強邊線攻力。