唔少英超球隊開季後，剩下一堆賣剩蔗，希望盡快掃落低組別或者賣去海外套現，但清貨日子得番個多禮拜，唔俾買入只俾散貨，換都唔得，想賣到好價錢好難。
賣剩蔗中，兩間倫敦球會嘅防中真禾特同艾利尼級數高，但新帥唔鐘意，又冇乜可能肯落英冠踢，前路茫茫。土炮真禾特睇怕要留番喺車仔打國內外嘅盃仔，艾利尼更可惜，當打、級數同速度兼備，雲爺爺上季季尾同佢續約後，估唔到自己「被辭職」；傳緊呢位埃及「孤兒仔」會被賣去法甲，但佢打防中，點都好過格列沙加啩？領隊愈換愈密，冗員愈多，水晶宮年年換帥，鶴臣成手貨要散，以符合英超聯規定嘅25人名單；賓捷安、蘇亞尼同查洛列迪禾特呢類二線兵人工唔高，英冠大會想爭升班啱用。
講到賣剩蔗，睇完曼聯敗走白禮頓，摩佬應該幾後悔俾安東尼馬迪爾出場踢咗一粒鐘，後者錄得一次唔中框射門咁大把。如果唔係紅魔一隊成員唔算多人，摩佬應會踢呢位所謂天才球星返法甲，費事眼冤。