「廠」迷自2006年歐聯決賽睇到愛隊負巴塞隆拿後，挫敗無限loop。就算貴為球會名宿嘅主帥阿迪達，再咁落去未必頂到好耐。疫情下有兩隊傳統強隊走勢近似，正係06年歐聯決賽組合巴塞隆拿同阿仙奴；兩隊喺今季歐洲兩大盃賽各自係唯一5戰全勝球隊，但返聯賽一塌糊塗，勝率喺四成或以下。巴塞隆拿問題出喺褪色球王美斯有離心；但西甲參差，巴塞仲大把空間反彈向上。阿仙奴要歸咎喺阿迪達身上，咁大場北倫敦打吡，仲派出一個踢咁多年中場都「四不像」嘅格列沙加，拍剛傷好嘅湯馬士柏堤打中場中間，延續中場毫無創造力嘅弱勢；中堅洛賀丁唔夠班、翼衛比利連速度漸慢。喺競爭激烈嘅英超，阿仙奴咁嘅「爛陣」搶分好艱難。
我唔太信阿迪達下月肯放奧斯爾出嚟救亡，短期自救方法有三，放班大牌前鋒禮拜四歐霸作客短程愛爾蘭鄧達克，當踢練習賽踢磨返利把刀。用幾位有膽識嘅土炮小將升呢英超試打攻中。今年最後一張牌，應係傷愈可打箭頭嘅巴西小將加比爾馬天尼利。