阿仙奴今夏仍未有重大收購，連領隊雲加都承認買人進展緩慢，大有機會以原班陣容出戰歐聯附加賽。此外，雲加亦證實前鋒謝雲奴即將轉投羅馬。26歲嘅謝雲奴，2011年夏天由里爾加盟阿仙奴，効力至今聯賽合共上陣46次，只有9球進帳，去季更失去正選位置，為爭取更多上陣機會，只好選擇離隊他投。雲加向來買人非常精打細算，經常以低價買入高價賣出，為球隊賺咗唔少錢，但係眼見勁敵車路士同曼城今夏四出招兵買馬增強實力，自己亦必須加把勁，否則來季未必保得住前四位。相信唔少廠迷亦希望雲加可以買多幾位具分量球員，爭取更佳成績。