周中日職聯加開快車，論戲碼首選神戶勝利船主場對鹿島鹿角。勝利船上仗喺少踢一人下，最終作客1比3不敵柏雷素爾，暫列第十位。佢哋今季主場成績一般，至今贏過4場，勝出率得40%，有前德國國腳普多斯基加盟，攻力明顯有所增強，但今仗有中場田中英雄停賽缺陣，或多或少影響中前場實力。鹿角近況愈戰愈勇，聯賽加盃賽連續11場不敗，取得10勝1和佳績，亦係日職近態最好嘅球隊，目前少踢一場下只落後「一哥」大阪櫻花1分，絕對有力後來趕上。
佢哋今季一反常態，作客表現仲好過主場，取得8勝1和佳績，係日職聯作客唯一不敗球隊。鹿角整體狀態大勇，至今有14位球員有士哥，佢哋近6次到訪勝利船，錄得4勝1和1負明顯佔優，今仗可睇高一線。