英超今季第33屆，史上得7隊波曾經封王；而「曼市雙雄」最威，合共攞咗21冠10亞。英超成日話競爭激烈，實際強弱懸殊，由小部分強隊壟斷爭霸；下游近年就充斥一季玩完嘅升班馬，隨住「兩曼」今年極罕有一齊下沉，爭霸新格局會係2025年甚至往後英超嘅焦點。
紅軍年尾先鬥李城再遇韋斯咸，攞6分安心做年終冠軍冇難度；班波今季新帥用舊班底出奇咁順，但倫敦雙雄車仔同阿仙奴下半季會愈逼愈近，呢個爭霸組合有新鮮感，值得球迷期待。反而年尾波，英超賽會慣例安排頻密大戰以饗放假嘅各地球迷，但戲碼往往失色；好似今年嚟緊兩輪快車，冇一場係傳統Big Six對戰之餘，20場波有9場係安排喺亞洲時段嘅深夜進行，天寒地凍對各隊精忠球迷睇波撐場都係一大考驗。計嚟緊跨年3場快車，焦點落喺曼市雙雄邊隊先反彈，睇賽程曼城只鬥愛華頓、李城同韋斯咸；比較曼聯鬥完狼隊，再撼紐卡素同利記嘅反彈機會大好多，只不過鬥心出事嘅曼城，遇上咁平淡嘅戲碼要攞足9分睇怕唔易。