「行路」過意甲
曼城喺冬窗花1.2億英鎊，速購重磅新兵鍊贏車仔，又夠狠同時放走「功勳元老」基爾獲加(Kyle Walker)去意甲AC米蘭。英超嘅「輕快」，相對意甲嘅「慢老」，又一強烈對比。
同上屆舊制比較，四大聯賽都好大機會同上屆一樣，16強(即頭16名)佔12隊，或者暫時第17位嘅祖雲達斯入到圍，增至13隊，意義都唔會好大。事關意甲兵團上屆3隊入16強，但去到淘汰賽全部出局，遇強即屈，行軍速度太慢有因。以往速度飛快、爆發力強嘅34歲獲加，今屆表現大跌，或多或少受場外多情困擾；但據聞A米竟然照俾佢賺緊嘅15萬英鎊周薪人工，當餘下半季嘅借用費外，仲應承之後提供多兩年新約。紅黑兵團本身不缺右閘，上仗歐聯排出全部11位非意大利人正選陣容，有星味冇實力，喺意甲俾榜首拿玻里拋離成條街，唔知貴為該隊高級顧問嘅「戰神」伊巴，有乜感受。當然以獲加級數，身重減速用步行(walk)姿態，都夠喺意甲立足一段時間；佢呢單刁，點都唔夠接近兩年冇出賽嘅前三獅國腳迪利阿里，加盟科木咁騎呢。