復賽無期，各地聯賽同球會開始要自救。意甲班霸祖雲達斯剛宣布一隊球員包括球王C朗及教練沙利，主動喺球季停擺期間唔出糧4個月，全隊支出慳返逾8千萬英鎊，誠意可嘉；可起牽頭作用之餘，泡沫自爆好過被篤爆。始終好景時，人人願意投資博錢揾錢，祖記前年簽球王C朗，當年單係球衣大賣數百萬件；據「福布斯」雜誌估計，該球會上年度全年收入高達3.87億英鎊，升至世界十大之末，仍只係榜首巴塞隆拿收入約六成，而祖記成季都係淨賺3千幾萬鎊，表面風光。既然球星效應用得着，祖記上年再用40萬鎊周薪，簽得29歲嘅阿仙奴中場藍斯；出手嘅豪氣，相信短期內喺歐洲球壇難見，並預計球員人工更堅離地嘅一眾英超球會，遲早跟從減薪潮。
對於包括Nike贊助費同「C7」一系列品牌，去年揾成9千萬英鎊嘅C朗，單係IG帳戶有2億粉絲；依家除咗困喺家中晒家庭樂，點解唔正經拍條片叫大家留在家中保命，外出就要戴口罩抗疫，更勝捐出對佢濕濕碎嗰幾百萬英鎊人工。