我發現，你問十個人估今屆歐國盃冠軍誰屬，有七個人都會話法國。當然啦，世界盃冠軍隊嘛，加上近年確實氣勢如虹。
事先聲明，我不是跟紅頂白，早在球王柏天尼年代，即八十年代已開始喜歡法國，後來進入施丹年代當然也繼續喜歡；即使隊波沉淪的時候，我都一樣力撐到底。上屆世界盃決賽，我有幸進入現場講波，親睹法國贏克羅地亞再度成為世界盃冠軍，都是非常興奮的事！
如果你問我：法國今年是否有機會贏歐國盃，重溫98年世界盃後再贏00歐國盃的好夢？其實我有保留，不過捧就一定捧。今晚F組法國對德國，是分組賽首輪壓軸好戲，亦絕對為分組賽最矚目大戰。雖然我不嬲捧法國，但對德國，都有一份情意結，因為我多年來一直講德甲波，對德國都非常熟悉。
論近況，擁有麥巴比、簡迪、回歸兵賓施馬的法國無疑較好，但德國難得處於一個underdog(退居下風)的情況，不被捧為大熱門，戰鬥力更加不容低估。這場大戰，我覺得兩隊實力非常接近，戰況難料。記得今晚睇第三聲道。
(法國對德國/Now 618及4K 616台今晚深夜3:00直播/設第三聲道旁述)