「心地唔好」

年輕時在電台，我曾經在一次訪問中，問非常熟悉娛樂圈的前輩查小欣小姐，識唔識「張如城」(如果你唔識，請自行Google)？事前我沒有通知小欣姐我會問有關張的問題，因為我當時想，她不認識張也不為奇(唔通你會問佢識唔識黎明係邊個)，我反而想借故帶出——張如城並未成功進入娛樂圈，因為小欣姐都未認證他。我自以為幾巧妙，又幽默，點知被前輩鬧了，難忘至今。

他說：「小欣姐係前輩，她肯接受你訪問，係幫緊你手。但係你咁樣問佢識唔識『張如城』，又冇事前夾定，而佢唔識，你咪即係set up佢令佢出醜？你咁樣係『心地唔好』。」記憶中我沒有反駁，因為我同意他，我將自己的利益(自以為的「幽默」)置於人家的利益之上，傷人利己，我做錯了。可是，這件事也令我難以忘掉的另外一個原因，就是因為那四個字「心地唔好」。

「心地唔好」是多麼重的一個罪名啊。當時年輕的我聽到，真有陰影，覺得自己差不多成了殺人犯，見到阿婆行過都想推佢出馬路，以傷害別人為樂咁滯；如果前輩其實只是想籍此令我深刻記住教誨，他成功了，我之後也有考慮這個，只是有點負作用。自己當時確實有點幼稚，有點自私，有點自我中心，有點急功近利，就好像說我有點鼻水，有點咳，有點燒，如果不理的話，是有可能發展成肺炎的，但兩下咳就被說成是絕症，「心地」有問題，這不是不治之症是甚麼？

前輩說，他也曾經被人這樣罵過，或者他覺得這是一種隔代教育，況且，給人罵一罵而已，我也不要玻璃心。杜Sir大聲當眾臭罵片場下屬後，難道要道歉？「唔好意思呀，頭先X你XX，語氣重咗少少。」只不過，時代不同，世代不同，加上「己所不欲，勿施於人」，後來當我有自己下屬時，我常常告誡自己，不能將自己的情緒，發洩於人家的自尊之上。像杜Sir的《大隻佬》，「萬般帶不走，唯有業隨身」，這種業就報在我身，就此停住，不用輪迴給再下一代，望化「X你XX」為「阿彌陀佛」。