鏈家吃掉中原中國我一點也不奇怪

中原老闆施永青與舊拍檔王文彥（持有45%中原股份）又互相指摘對方不是，施永青希望將中原上市，但王文彥提出幾點要求，老施覺得不可接受，雙方透過媒體發炮，結果都係解決唔到問題。

點解老施要急急將中原上市，其中一大原因係國內間地產中介「鏈家」近年急速冒起，不單威脅中原內地老大哥地位，若以生意額或分行數量計算，已經遠遠超越中原，特別喺北京呢個兵家要地，市佔率更加超過6成。今年「鏈家」融資70億人仔，成間公司估值接近人仔370億元，老施一來羡慕，二來妒忌，三來就係驚。

沒有共存只有獨大

唔係開玩笑，「鏈家」已成為一隻獨角獸（靠風險投資而估值達到10億美元公司的別稱），呢類公司特性係透過互聯網為平台，藉不斷融資而進行收購合併，急速壯大，過程中佢唔需要賺錢，目標係要蠶食整個市場，達到壟斷時，就係賺大錢之日。

「鏈家」不光靠融資擴張，經營模式亦癲覆咗傳統地產經紀運作，「鏈家」標榜要實盤實價，成立時又唔請啲有經驗嘅經紀，怕學壞師。最重要係佢哋老細「左暉」係IT出身，好強調做好個互聯網，透過個平台進行O2O的經紀服務，並通過大數據，將客戶需要、喜好及問題作出分析配對；加上佢哋唔單止做代理，透過網上平台仲旁及金融及貸款，呢幾方面中原大大落後，特別今日講「互聯網＋」，大陸人走前好多步，老施連Facebook都唔多識玩，你就知距離有幾遠。

事實上，早前「鏈家」融資引入的風投並非係阿茂，而係騰訊、百度、華晟等大企業大基金，實力十分雄厚，若然「鏈家」進行多兩輪融資，隨時有能力買起中原。你睇內地打車軟件，舊年由「滴滴打車」併購「快的」，成為今日「滴滴出行」，最終兩大變獨大，地產代理何嘗唔會出現咁情況。

不計成本殺絕對手

「鏈家」最近一輪融資的條款係要5年內上市，否則要以每年8厘利率償還貸款，即係話「鏈家」呢5年肯定會加快步伐，追住中原嚟打，迅速兼併擴張去上市。內地獨角獸燒起錢嚟嗰種狠勁，不惜以本傷人，冒求殺死對手成為行內唯一生存者。

面對鏈家挑戰，中原有冇足夠子彈對抗，老施話現金有廿億，但喺今日燒錢打仗情況下，廿億並唔係好多；要集資，老施與王文彥爭拗綁手綁腳，上市唔使諗，要引入投資者亦好難獲王文彥同意，換句說話「鏈家」有子彈去燒錢，你中原就只能綁起隻手捱打，可變招數唔多，老施又接近7張，若然情況愈嚟愈不妙，你話佢會賣走中原中國，我真係冇懷疑。