陳伯患有晚期退化性膝關節炎，日常生活深受膝痛困擾。原本他在公立醫院內正輪侯全膝關節置換術，但因為遙遙無期，所以他的兒女帶他向私家骨科醫生A求診。醫生A建議他接受新式機械臂輔助換骹，以提高手術精準度，但由於費用略貴，故此他們再向骨科醫生B尋求第二意見，而醫生B卻認為傳統換骹方式較適合他。
然而，陳伯有所不知的是，醫生A和B本身相熟，這天更在手術室的茶水間內相遇，邊喝茶邊閒聊。
A：「依家係AI年代，做手術當然要與時並進啦！傳統換骹，醫生用手提電鋸切除損壞嘅關節面，然後安裝金屬假體，精準度全靠醫生嘅經驗同技術。但有咗機械臂輔助，術前先做電腦掃描，建立3D關節模型，就可以預先計劃好假體嘅尺寸同植入嘅位置。而做手術時，機械臂鋸會設定喺安全範圍內截骨，萬一超出範圍就自動停止，將周邊軟組織受損嘅風險減至最低。有咁好嘅技術，點解你咁少用嘅？」
B：「你講嘅嘢，我絕對認同，而我間中都有用機械臂輔助換骹㗎！尤其係對於年輕嘅關節退化患者，如果本身骨質密度正常，想植入更耐用嘅生物型關節假體，等骨骼細胞同假體融合，唔使靠骨水泥嚟固定關節，就真係需要用到機械臂嚟精準啲截骨。但我始終覺得，機械臂仲需要更多研究數據，去證實佢『完勝』傳統人手技術。加上機械臂嘅成本仍然偏貴，最終都係會轉嫁落病人身上。」
A：「貴就貴咗啲，但一分錢一分貨嘛！最近我睇到網上一則笑話，因為係用簡體字寫，所以應該係內地人作嘅：話說有個病人走去做手術，醫生收咗佢一萬蚊人仔。但當病人得知，植入嘅金屬，成本只係一百蚊嘅時候，佢就走去同個內地醫生理論，質問點解收貴佢一百倍。點知個醫生同佢講，手術費有99%係醫生多年嘅資歷同經驗，成本只係佔1%。佢聽完之後就無語了！當然喺香港做換骹手術，植入嘅人工關節，起碼佔醫生手術費嘅四成，都未計生產機械臂嘅醫療公司，本身有研發成本同專利！」
B：「話就話醫療技術推陳出新，但新技術嘅臨床效果，係咪比舊嘅好好多，符合成本效益，真係有商榷餘地。講起機械臂，最近有醫學系統性文獻回顧就發現，機械臂輔助換膝關節，對糾正下肢變形，的確較傳統手術更理想。但喺功能上嘅評分，例如痛楚程度嘅減少，活動能力嘅改善，同術後併發症嘅百分率，兩者就冇統計學上嘅明顯分別。你聽過經濟學嘅邊際效用遞減理論未？用比喻嚟講，假設傳統換骹有90分，用埋機械臂就可以攞到95分，但要攞多5分，就需要投入更多成本啦！」
A：「你有你嘅道理嘅⋯⋯不過如果出咗部最新型號嘅手機，就算硬件同軟件功能多到用唔盡，但係買得起嘅你，都會心思思想換機啩？」
B：「俾你發現我仲用緊iPhone 8添！但估唔到佢咁襟用，當然同人工關節，有成20至30年壽命冇得fight啦！」
此時手術室廣播：「病人陳伯已進入6號房，請醫生前來預備手術。」到底陳伯及其家人，最終選擇了傳統換骹(B餐)，還是用機械臂(A餐)來助他一臂？
作者為骨科專科醫生