曾：「我係真醫生。」林：「我係臨病人。」曾：「今日我哋講啲同膊頭有關嘅病。」
林：「如果由低層做起，成日搬搬抬抬，手臂遞高時膊頭開始會痛，依個病叫做？」「肩關節夾擊綜合症。負責郁動膊頭嘅肩袖肌腱，喺肱骨頭同肩峰之間穿過。如果成日要遞高手臂工作，例如將貨物上架落架，肌腱同滑囊就會受到兩者夾擊摩擦，導致發炎同痛楚。如果肌腱繼續勞損，日後可能出現肩旋轉袖斷裂。雖然上一手同事都係咁托，但識得避重就輕，都係打工仔嘅生存之道。」
林：「咁如果做中層成日慣咗A字膊，依個病叫做？」曾：「你所指嘅A字膊應該係圓肩。中層通常都要坐喺度做嘢同開會，好容易會坐到寒背同膊頭前突。日子耐咗仲會令胸肌繃緊，背肌無力。圓肩除咗外觀問題，仲會引致肩頸痠痛，肩袖肌腱又會更容易受夾擊。其實單嘢唔係你跟開，就算開會坐到有圓肩，都唔代表你有膊頭承擔。不如起身做多啲運動，去改善A字膊仲好。」
林：「咁如果做到50歲，終於成為高層，但膊頭又痛又緊到郁唔到，依個病叫做？」曾：「人到中年，容易患上俗稱五十肩嘅肩周炎。肩周炎係肩關節囊發炎，通常成因不明。起初只係膊頭痛，之後關節會出現黏連，令膊頭郁動變得僵硬，病情仲可以長達一年。趁早求醫同做物理治療，可避免病情嚴重到，連自己係老細都愛莫能助，惟有做手術先能夠鬆解黏連。」
林：「咁其實卸膊對膊頭嘅健康係咪有益㗎？」曾：「搬搬抬抬同坐到圓肩，當然對膊頭無益。但你想卸俾人哋做，都要等你成為高層先講。試問成日卸膊嘅中低層，老闆又點會提拔？」 作者為骨科專科醫生