曾：「我係真醫生。」林：「我係臨病人。」曾：「今日我哋講啲同硬頸有關嘅病。」
林：「如果瞓醒後條頸又緊又痛，過一兩日會自己好返，依個病叫做？」曾：「急性頸椎關節周圍炎，俗稱瞓捩頸或者落枕，通常同枕頭太高或太低、習慣趴睡、經常做低頭族等有關。當頸椎喺瞓覺時成晚都維持不當姿勢，就會導致肌肉繃緊同關節卡住。只要平時多做頸部伸展運動，避免成日低頭望電話，同選擇高度、軟硬度適中嘅枕頭，都可以預防落枕。」
林：「咁如果成日坐低對住電腦，後頸肌肉覺得痠痛同繃緊，依個病又叫做？」曾：「簡單嚟講係都市病，因為成日對住螢幕，容易慣性將頭向前伸，令後頸嘅上斜方肌同提肩胛肌變得過度繃緊而出現肩頸痠痛。如果加埋寒背同圓肩，長期肌力唔平衡就會形成上交叉綜合症。所以除咗做頸部伸展運動，坐低時仲要提醒自己：挺胸坐直，耳仔同膊頭由側面睇，要保持喺垂直線上。」
林：「咁如果由腰到頸都硬到不得了，甚至唔可以抬起頭向前看，依個病又叫做？」曾：「要排除係強直性脊椎炎，佢係自體免疫性疾病嘅一種，患者通常係男性，後生開始發病，主要影響中軸骨骼，造成慢性關節炎。起初腰背痛同僵硬會持續3個月，到後期中軸關節會逐漸融合。當頸椎關節融合而變得僵硬，頸椎就變成咗一條長骨，萬一唔小心跌倒就會導致頸椎骨折。」
林：「咁如果自以為是，唔肯聽人意見，依種硬頸又叫做？」曾：「依種硬頸，其實同數目字7有關。頸椎一共有7節，就係要我哋靈活屈伸，唔好死牛一便頸：只係擰頭拒絕，唔肯噏頭認同；只顧左邊奉承，忽視右邊忠言；只對準螢幕中央辦事，懶理旁人嘅意見同感受。」
作者為骨科專科醫生