《盜月者》和李龍基
賀歲電影《盜月者》，客觀嚟講係一套好難得嘅電影。點解呢？香港電影近年好多時都係透過社會議題，引起大眾討論谷票房，例如《年少日記》、《白日之下》，以至再早前嘅《淪落人》，就連史上最高票房嘅《毒舌大狀》都係。商業賀歲片，八、九十年代，成龍、周星馳、周潤發嘅動作、搞笑、賭博混合片，近年幾乎絕跡。
純商業片其實係好考真功夫嘅。故事推進夠唔夠暢順？鏡頭剪接夠唔夠明快？好多人睇唔起商業片，覺得只為錢，有人會反駁︰電影係生意，唔搵錢為乜呢？我就覺得商業電影仲有一個好重要嘅功用，就係唔需要依靠觀眾背景知識，純粹用商業元素接觸不同觀眾。講社會議題嘅電影，好視乎觀眾咩背景同睇唔睇得明。但一個故事流暢、畫面音響俐落嘅商業片，唔同背景嘅觀眾都會明，更係一個產業同文化輸出嘅基本功，做得唔好，就永遠打唔到出去。今時今日問日本人最鍾意邊個香港人，好多仍會答你係成龍，因為動作片真係衝破語言界限，近十年香港嘅台前幕後掌握到呢樣嘢嘅人少之又少。我覺得《盜月者》並唔係乜嘢傑作，但最起碼所有技術元素合格有餘，夠爽，唔多餘。
批評呢套戲嘅人，大多鬧套戲唔知做乜，見到MIRROR三個就憎之類，呢種心態令我諗起近排最紅嘅娛樂新聞。
李龍基嘅愛情故事高潮迭起，大部分人批評女方，殘忍嘅係即使男方擺明係受害者，網上討論都係恥笑居多。黃子華講過，香港人最鍾意睇人xx，有人習慣取笑人，習慣將一件事嘅其中一面放大甚至扭曲，無論係李龍基對愛情嘅渴望，定係MIRROR參與任何電影，都會俾人話只係呃fans錢太商業冇深度。呢班人，只係從取笑、批評、睇死其他人自我安慰，無論對李龍基呢種老人家，定對MIRROR呢種年輕人。我哋改變唔到佢哋，不過要提下自己，唔好變咗做佢哋。