《魷魚遊戲》相隔3年終於推出第二季，第一季風靡全球，第二季預算同時間上都有更多空間籌備，播出前已有快餐店同語言軟件等一堆推廣。不過續集不嬲都唔易做，《魷魚遊戲2》上線幾日，似乎好多人都麻麻哋收貨。
以下含小量劇透︰頭兩集用大量篇幅講主角點樣重返遊戲，劇情上係有需要，但以韓劇今時今日嘅節奏來講未免太慢，最慘係內容亦唔係好精彩，情節亦相當大路。若果係孔劉粉絲可能會開心啲，佢今季出鏡率多過上季。
即使係戲肉玩遊戲嘅部分，無論遊戲設計同人性描寫，都冇上季咁精彩，好多都係預計之內，只能講續集真係非常難超越首季。即使編劇同導演已經加咗好多心思，或者001號呢啲計算好嘅元素，希望帶新鮮感或者感動位俾觀眾，但可能期望太高，睇晒成季我都冇咩出乎意料嘅位，唯一例外就係紅衫女仔(費事再劇透，睇過應該明我講乜)。而為咗迎合歐美觀眾，仲加入政治正確到不得了嘅變性人，計算上係啱嘅，但就係冇感覺。至於執行上呢？其實唔錯，又有槍戰、又有明星、又有美術，但係感覺上就無咩溫度，唔太有共鳴。
《魷魚遊戲2》與劉德華
上個星期我又睇咗劉德華演唱會，正所謂「動作很劉華」，其實都係暗指劉德華有少少老土。我唔係劉德華粉絲，我睇完佢60幾歲人又跳又唱3個幾鐘，冇咩感覺同溫度，但有一樣嘢我被佢打動咗，就係執行力極強，節奏明快，3個幾鐘零冷場，全靠所有表演者、燈光、音響同埋劉德華本人近乎完美嘅執行力。
雖然《魷魚遊戲2》同劉德華演唱會都冇乜感覺帶到俾我，但我係欣賞劉德華多啲嘅，以執行力取勝，仲要係持續超過40年嘅執行力。近年因為為聲演填海片而由「民間特首」變成「填海華」，劉德華即使難以挽回「最受歡迎男歌手」紀錄保持者嘅喜愛度，我覺得都起碼值得大家尊重，係對一個人堅持同專業嘅尊重。否則我哋只會變成不分好壞，只講立場嘅人。