貧窮才打機

一家四口在將軍澳租單車踩，或者因為共享的競爭已成過去，舖頭報價每小時共$260，起碼兩粒鐘才過癮吧，那便超過一張大牛了。孩子起哄：「不如回家打機。」我說：「打機無益。」孩子說：「節儉呀。」駁佢唔到。

我老派人，先天覺得一切電子虛擬玩意皆奢侈、浪費，想深一層，恰恰相反，實體畢竟有物質成本，倒更花錢。單車為例，嫌租貴，買一輛回家固然可以，但按府上呎價，計落更高昂。推而廣之，若貴子女愛毛公仔，可想而知幾佔地方，愛打機呢，就極省位置。

吾輩認定打機敗家，源自雅達利的童年回憶，可望不可即，接着機竇成行成市，一天打幾十蚊對學生是沉重負擔，但再之後如何？劇界王子、金像獎新人凌文龍告訴我，自幼家貧，夢想很簡單，出身打工首個月糧率先用來買PS1，理由是：「今後能夠慳唔少。」心滿意足了。

此乃實情喎，撇開貨金，大部分玩家煲來煲去兩三隻games(如FIFA)，所費有限。手遊主流，免費download更多的是。當然，專業級配件貴，但專業單車也貴啊。以入門而言，打機幾乎比一切運動、樂器都廉宜。

還有時間成本。工作忙的家長陪兒女戶外活動談何容易？不陪又不安全，這時，留家打機各得其所，雖然，鬼唔知郊遊身心健康咩。

所以，無論你接不接受，電競可能是窮孩子出頭天。