當教主回歸盧瀚霆

Anson Lo＠MIRROR剛完成第二次個人演唱會，傳媒焦點集中喺佢條26吋腰、人魚線同爆開嘅褲鈕。作為場內少數嘅男性觀眾，我知道我以下講嘅觀察可能被認為係「錯重點」，但我覺得Anson Lo未來要走得更遠，超越偶像派「教主」，成為新一代跳唱王者，以下呢啲先係重點。

一、舞台效果升級。Anson Lo以新一代跳唱歌手來講，表現算係突出，亦好快有《Megahit》呢啲令人記得嘅代表作，但要駕馭一個舞台又係另一種境界。今次演唱會我覺得Anson Lo開始做到，由開場同dancers大堆頭嘅舞台布局，之後一個人台上又唱又跳，都感受到Anson Lo舞台融合度再提升咗，駕馭到呢個亞博有史以來最大嘅舞台。

二、貼地突破「教主」形象。貴為教主，Anson Lo一直俾我感覺係有啲離地，好聽啲就係有一種偶像嘅距離感。但今次演唱會，佢除咗喺舞台設計上拉近與觀眾距離，演唱會期間講嘢部分都令我改變咗對佢嘅印象。佢提到最近爆紅嘅「大寶冰室」肉餅飯，亦都有叫大家繼續關心大埔火災受影響嘅人，令我見到更立體的盧瀚霆，唔只係舞台上偶像。

三、情緒更放鬆享受舞台。同2023年個唱相比，Anson Lo今次明顯更輕鬆自在，記得佢上次講壓力大講到喊，今年雖然都有講壓力，但明顯已搵到出口。我留意到，開場前大銀幕列出心理輔導的熱線資料，究竟一個歌手經歷咗咩先會特別關注精神健康？不過我都樂見佢寫上：「因為只有愛才是出口，一齊加油！」比起之前多咗輕鬆與自信。

Anson Lo確係有好多神徒，但大家都知haters亦都有好多，有人覺得佢形象唔係傳統偶像「大眾路線」，風格未必係所有人接受，要更多時間去沉澱與欣賞。Anson Lo要走得更遠，唔只要得到神徒喜愛，亦要讓更多人見到教主以外嘅盧瀚霆，得到多啲街客嘅支持。