兩段緋聞

娛樂圈緋聞幾乎日日有，孰真孰假，或者都唔係大家最關心嘅，反而當事人應對嘅態度，就反映一個人嘅人品同情感價值觀。近日，娛樂圈兩單緋聞，Error嘅193 vs COLLAR嘅Candy，以及崔碧珈vs鄭健樂（Rocky），我就覺得幾精彩。

先講193同Candy，二人被傳媒影到一齊去打邊爐，Candy更上咗193架車，講到好有嘢咁。不過，其實之後好快已知道兩人係為193新歌拍片宣傳而見面，打邊爐時亦有其他人在場。雖然算係澄清咗單緋聞，不過風波並冇因此而平息，事緣193話有Candy嘅粉絲私訊叫佢唔好利用個女仔，一向忍唔住口嘅193隨即公開並引發一場網上罵戰。最後仲要Candy兩次在TG上水安慰粉絲，為男方解圍，話自己唔介意男方拎緋聞來講笑，叫粉絲唔好嬲。

至於崔碧珈同鄭健樂，男方最早喺社交媒體高調宣布「戀愛中」，上載合照又更改感情狀態。但崔碧珈就同記者講自己係「瞓醒先知道呢件事」，讚男方係「認識嘅人當中最高分」，但都表明二人只係「好好好好好嘅朋友」，仲話男方「我都好單純，佢比我更單純」。被派「好人卡」嘅Rocky之後發表長文，講述事件經過，承認改感情狀態係未得到女方同意，認為要為女方因此飽受負面輿論同壓力負上責任。

Rocky長文當然引來一班花生友笑佢天真又戇居，識咗未夠24小時就咁投入示愛。但有一點不得不承認，佢展現出對呢段關係嘅重視與承擔，不怕被拒、不怕尷尬，願意企出來攬晒上身，呢種坦率與勇氣，我係女方會大大加分。相反193同Candy原本可以當得啖笑就完，但同粉絲對罵，令事件持續發酵，即使二人唔係情侶關係，男方亦明顯冇好好保護女方，反過來要女方為男方講好說話，唔好講女方有冇興趣同佢發展，我作為花生友都大大減分。

或者有人覺得，兩段關係，兩種處理手法，係因來自兩個年代嘅人。我認為有啲嘢係應該直到永遠，就係尊重女性，唔只作為一個藝人，而係作為一個男人。