Chill Club新投票機制
ViuTV一年一度嘅《CHILL CLUB推介榜年度推介》下月舉行，有別於以往網上投票，今年引入埋實體投票，年度歌曲大獎同歌手大獎，都係由網民投選出最後五強，再喺頒獎禮當晚由觀眾一人一票選出最後贏家。
有聲稱係「神徒」嘅人網上話已手握好多飛，立即引起粉絲界一輪罵戰，有人質疑「神徒」種票，仲鬧埋公司擺明偏心Anson Lo。最激動當然係「姜糖」啦，即使Anson Lo同姜濤已分別公開否認咗呢件事，話問過公司證實並冇事前分飛俾入任何人，但似乎大家仍比較相信自己想相信的事。粉絲為愛盲目我明，但我作為一名樂迷，就想有少少理性分析。
首先點解Chill Club今年引入現場投票機制？我呢個係真問題，我真係唔明點解做到第五屆先引入。行內人都知，現場投票一定令粉絲入場嘅意欲大大提高，爭飛入場幫偶像爭獎，而對於呢種非賣票嘅頒獎禮來講，呢個亦係吸引贊助商嘅重要手段。呢招每年叱咤已用到爐火純青，作為免費電視台Chill Club今年先引入，我反而係有啲surprise。
新機制係想令到門票更受歡迎、多啲人爭，基於以上邏輯，我覺得事前分飛同偏心嘅指控都難以成立。你諗下，有班人唔使爭就可以留起一大批飛，完全違反「競爭激烈、價錢提高、收入提升」呢個如意算盤。至於話公司偏心，想捧某一個人，咁其實就唔好搞咁多嘢，又網上又現場投票，網上你都仲可以話睇唔到幾多人投、投咗邊個，現場投票睇燈牌就心裡有數。真係有私心，閂埋門欽點自己人仲直接，香港樂壇以前又唔係未試過。
偏心一個人係要極端可控，但現場投票就係最多可能性出現，所以只要有簡單邏輯，就會明兩件事冇可能共存。不過近年大家重視刺激，貪求方便，無論係對娛樂嘅耐性，定接接收資訊、作出分析嘅耐性，已經由一本書減到去一套劇再減到一套電影，到而家只得一個Reel。一個Reel嘅時間，一定係立場先行，感官引導，唔講邏輯，唔係因為大家唔聰明，只係因為大家冇耐性。