上周五TVB股價突然爆升逾51%，收市報全日最高位$5.85。
電視廣播(0511，TVB)股價近年長期處於低迷狀態，2018年時都仍有廿幾蚊(比起千禧年的高位$81.5相差一大截)，但三年前開始便只得個位數，到過去幾個月更一直維持「三字頭」，搞到買了無綫股票的都會眼淚在心裡流。好難怪一班小股東要組成「大台小股東大聯盟」，列表炮轟TVB董事局七大過失，向許濤、黎瑞剛等興師問罪。不過，最近卻好似出現了難得的一線曙光。
剛剛過去的星期五(3/3)，TVB股價突然爆升逾51%，收市報全日最高位$5.85，創有史以來單日最大升幅。股價升跌主要睇供求關係，公司有正面新聞，需求就自然會上升，而今次TVB在市場上一洗頹風，好明顯與旗下上海翡翠東方傳播，與內地最大網購平台淘寶網宣布合作有關。TVB指出，今次合作會組織旗下藝人推出至少48場帶貨直播，不但「啟動TVB電子商貿直播的重大里程碑」，更預計帶來「千萬元級別」的收益，而「淘寶直播」微博帳戶仲寫到明3月7日會有首場直播，時長6小時，有陳豪、陳敏之賣海味。
王祖藍曾推介TVB股票。
遠水不能救近火
不過，只要細心觀察，就會發現到這個合作消息明明早於3月1日收市後公布，但股價去到第二日未被炒起，要隔多一日去到3月3日先至識得爆升，確實古怪。除了這一點值得深思，大家都應該諗諗，這次合作對TVB幫助有幾大，搞48場帶貨，幾近傾盡全台一、二線藝人，馬國明、湯洛雯、陳瀅等個個都走唔甩，但竟預計只得「千萬元級別」收益。相信大家都記得TVB上年上半年「見紅」蝕2.24億，倘若情況依舊繼續「億億聲」，好難單靠帶貨轉虧為盈、填氹。所以這次搵淘寶合作，既是遠水救近火，亦是杯水救車薪。
網絡年代，做了甚麼，講了甚麼，呃不到人，只要曾經發生過，打幾個字再搜尋就會找到根據。2021年11月，剛剛回歸大台做「首席創意官」幾個月的王祖藍，提到大台股價時就話「抵買，係入貨好時機」、「我都想入貨」。當時TVB每股低過六蚊，而去到今時今日，就算奇蹟爆升了逾51%，亦只是回到當年的水平，仍然突破不到六字關。如果有人聽取王祖藍的「貼士」走去入貨，捱得到上星期五都總算打個和，但持貨期間收不到股息，變相實蝕……當然，可能有人以為是娛樂新聞訪問亂噏幾句不用成本，如此戲言你都跟風，是你蠢與人無尤，但事實上就是輕輕一句便已經可以累死人。
利申，我沒有買TVB股票，只懷著慈悲之心，希望TVB搵到方法開源節流搵大錢，帶挈股價長升長有，「坐艇」的人都可以回到家鄉。