![何謂靠鏡仔上位?](https://cdn.am730.com.hk/s3fs-public/styles/article_image/public/2024-08/17-01_0.jpg?itok=m5-S-Me4)
何謂靠鏡仔上位?
最近鏡粉圈因為一件事,非常團結咁喺網上熱烈討論,事緣剛完成個唱嘅AK,佢嘅舞蹈總監Tank,喺自己嘅社交平台出咗個post,形容「處男show圓滿結束」,會同AK「一齊闖天下」,引起大班粉絲負評反擊。舞蹈總監同AK係好兄弟,由《造星》開始大家都知,咩事令一班粉絲唔「愛屋及烏」,仲大力批評佢「借鏡仔上位 」?
綜合網上反應,舞蹈總監唔只令粉絲不忿偶像個唱被騎劫,亦一次過翻起過去兩年「舊帳」。演唱會事件後,舞蹈總監係其中一個最高調針對MIRROR同公司嘅dancers,當時聲稱唔再接相關工作,仲鬧埋同佢哋合作嘅人,又批評鏡仔復工等等。今次舞蹈總監個post,唔只引起一班「生粉」不滿,監製莊少榮都留言話希望佢明白做演唱會要平衡好多嘢,仲團結到成班鏡粉爆發積壓嘅怨氣。
演唱會事件後,坊間對鏡仔同公司有好多情緒式批評,基於大家唔熟悉演唱會行業及運作,槍頭亂指,鏡仔同鏡粉都只能默默承受。但經歷警方拘捕、法庭審判,責任更清晰。有粉絲仲搵返上年舞館承認冇為舞者買保險,被法庭判罰款,當時舞蹈總監仲為舞館寫求情信。但當日被無理指控嘅人,就硬食咗。基於對偶像嘅尊重,鏡粉本身都冇出聲,但今次去到覺得偶像「被消費」,亦難若無其事。
一個藝人要成功,靠好多台前幕後支持,係唔係都話人「靠鏡仔上位」,好似忽略咗呢班人本身嘅能力同努力,但我諗「靠鏡仔上位」講緊嘅,係一班機會主義者︰「即係話紅嘅時候就合作,有困難嘅時候就唔見人,甚至掉轉槍頭。」有鏡圈人覺得,今次睇清楚咩人係真兄弟,更希望大家睇到有班人默默頂住批評真心幫班仔,真係做到「你贏,陪你君臨天下!你輸,陪你東山再起!」我聽講有個人,近年更主動要求藝人唔使公開多謝佢。做得好,大家讚鏡仔、讚監製、讚其他台前幕後就得,自己唔想咁高調。
作為鏡粉,彼此不說仍清楚,心裡知道邊個真正有承擔就好。