兩鏡粉辯論
鏡粉A︰聽講Ian會開到7場，好開心﹗
鏡粉B︰唔開心囉，佢冇得休息。
鏡粉A：好多歌手都係一連開咁多場，陳仔又以慢歌為主，冇問題啦。
鏡粉B︰肯定係公司想用盡佢啦。
鏡粉A︰陳仔自己話想開喎！佢都想多啲粉絲有得睇，公司又盡力配合佢加場。
鏡粉B︰我唔理啦！同埋開咁多場一陣好多吉位咁咪好樣衰？仲有AK開得一場，超級大細超囉！
鏡粉A︰如果你覺得公司要用盡班仔，咁點解AK又唔開多幾場呢？
鏡粉B︰即使AK粉絲冇Ian咁多，公司都應該開多幾場，以示支持呀！
鏡粉A︰咁佢開多幾場又唔怕多吉位唔好睇？
鏡粉B(大大聲)：我唔知你咩邏輯，總之Ian開咁多我就心痛個仔，AK開咁少我就戥佢唔抵啦！
鏡粉A︰追星係唔使講邏輯嘅，我擔心太是非不分，最後會害咗鏡仔？你睇另外兩上弦，兩班粉絲互片到一個唔理性嘅地步。以前偶像嘅粉絲互相較量，都係鬥人多，追車買飛支持，佢哋竟然搞到去廣告商度，質問人哋點解唔搵自己偶像代言。雖然只係好少數粉絲行為，但影響好大，嚇走廣告商，自己偶像都會受反擊，損人又害己。
鏡粉B：追星係咁㗎啦，幫自己偶像搞到「對家」雞毛鴨血洩憤。
鏡粉A︰你追星唔係為咗得到快樂同埋愛嘅咩？係洩憤㗎？同埋，唔係你偶像就係「對家」咩？隊友嚟㗎喎。認清你咁做有咩人會開心？(手指向另一方向)
(原來有一班人一直企咗喺兩位鏡粉對面不遠處，嘴角泛起一絲微笑，睇嚟就唔似係鏡粉。)
鏡粉B：原來益咗呢班人﹗
鏡粉A︰唔好呀……你衝過去攻擊，人哋求其笠件鏡仔T恤，外人就以為係鏡粉內鬥，所以唔好捉鬼，唔好反擊。只需要做一樣嘢，就係知道佢哋嘅存在，望住佢哋，同時又忽略佢哋。
以上對話，應該純屬虛構。但你，明唔明？