在電玩Biotic War裡係威係勢的男主角，真實只是一名清潔工。
煲劇狀態仍好低迷，套套都開咗頭但煲唔切，對美漫迷來講，鍾意暗黑暴力的應該對《Marvel’s The Punisher》唔會失望，雖然我已經對超級英雄劇種好疲憊，但呢套製作水平中上，值得繼續煲。同期Netflix的西部牛仔劇《Godless》百分百向這種類型片致敬，劇本製作都好用心，係節奏慢少少，有些集數長度有如一套短少少的電影(70多分鐘)，我煲到第四集，漸入佳境，全劇七集應該煲得完。
兩位來自未來的人類戰士Wolf和Tiger非常爆笑，選角出色。
低B科幻時間旅行
重劇情兼重口味劇集以外，都要來點輕鬆的調劑一下，今日想講呢套低低哋lo-fi科幻+電玩+時間旅行喜劇《Future Man》，一講監製係呢對喜劇拍檔Seth Rogen同Evan Goldberg(《Knocked Up》、《This Is The End》)，都知男主角一定係溝唔到女嘅可憐蟲、食物鏈最底層、what a total loser那類人物，找來《The Hunger Games》中飾演Katniss Everdeen(Jennifer Lawrence)愛人Peeta的Josh Hutcherson出任男一，在劇中連名都一樣叫Josh，本身都已是一個gag，電影粉絲分開兩大陣營，一面是覺得另一男主Liam Hemsworth咁靚仔，Katniss點解會唔揀佢而揀Josh；另一面母性比較強，比較能理解Katniss與Peeta共患難後的真情，而且愛情不同比武，不一定勝者為王(至少在電影世界裡是)。
遊戲機舖兩位配角雖然只佔很少戲分，但將機迷那種nerd演活，非常搶戲，造型上那女戴住那副紅色眼鏡一絕，好想搵番副戴吓。
生化人統治地球
此劇有不少類王晶的屎尿屁及黃色笑話，在低級趣味中卻隱含微言大義。劇集一開首就講男主角Josh是科技企業中一位清潔工，一事無成公餘時間只曉沉迷打機，仲要打打吓機對住電腦芒裡的電玩女主角打埋飛機，就在打爆機(both)一刻，遊戲裡面的兩位主角Tiger及Wolf(Eliza Coupe及Derek Wilson飾)跳進現實世界中，原來這個遊戲是未來人類創作出來的揀蟀戰，因為未來世界人類面臨滅絕，給生化人(Biotics)統治地球，人類唯一出路就是尋找救世主，將創造生化人的科學家Dr. Kronish殺死，而遊戲的勝出者就是救世主Future Man，亦即是在Dr. Kronish的實驗室做清潔工的Josh。
監製Seth Rogen及Evan Goldberg已是荷李活低俗喜劇新貴，新作排到2019，電影方面我期待他們跟James Franco合作的《The Disaster Artist》，重拍號稱史上最爛西片《The Room》的製作經過。
明日世界可能成真
好多錯位笑料就在兩位未來戰士來到今日地球發生的，因為未來人類面對饑荒，正常社會的基礎土崩瓦解，例如家庭、人際關係都完全消失，他們只在地下世界潛伏，甚至連植物都未見過，是以Wolf有得食伴碟的沙律菜都已如獲至寶，Tiger殺人唔眨眼連BB也不放過，因為未來人類已無法生育，根本不知道嬰兒是生命。在荒誕低B的笑話中，明顯借喻今日人類不作警惕，繼續無視氣候變化的話，明日世界絕對有可能成真。