姜神粉絲的數學題
有關姜濤同Anson Lo 粉絲不和嘅新聞，久唔久就有，近排仲來個機場混戰，當中誰是誰非，真真假假一篇文講唔晒，大家亦都已經有晒睇法。姜濤同Anson Lo都勸fans安全第一，姜濤仲開live自責做得未夠好。
做偶像，fans為咗你打餐死，明知唔啱都唔可以直斥其非，又係幾無奈。追星從來都係感情行先，其實勸都勸唔到，所以我以下從一個極理性但係低能嘅數學題分析呢件事。
到底「搞事」粉絲嘅比例佔幾多呢？我當粉絲有以下分類：
1) 只鍾意姜濤，對AL無感；
2) 只鍾意AL，對姜濤無感；
3) 鍾意姜濤，好憎AL；
4) 鍾意AL，好憎姜濤；
5) 兩個都鍾意，但程度有唔同；
6) 兩個一樣咁鍾意
7) 其他
呢條問題之所以低能，因為係唔會有答案，但有一樣嘢係肯定嘅，就係只有第三、四項嘅fans行為先會被睇到。就算佢哋只係佔1%，喺網絡世界佢哋就係100%。所以以上嘅低能數學題，背後可以演算為一個陰謀，就係任何人如果想令姜神甚至成個MIRROR形象唔好，四個字︰輕而易舉。因為用好少資源，都會被無限放大。我哋就由數學題進入思考題︰咁做邊個會得益？
一杯水污糟咗，係唔係一定冇得救？即使拎唔走舊污糟嘢，都可以選擇不停加入清水，俾啲時間，渾濁嘅水都會變返清。就算控制唔到有人將壞放大，都可以投入更多好嘢去抗衡，唔好俾劣幣驅逐良幣。
每個年代都有fans之間嘅鬥爭，由譚詠麟與張國榮、四大天王、陳冠希與余文樂，到今時今日MIRROR 12子對外對內都有。但我可以肯定十幾廿年後，其實邊個紅都唔重要，明星都有盛衰周期，fans間嘅恩怨都會淡化。
唯獨網絡只會不停發達，我哋選擇善良，其實唔係為咗保護偶像咁簡單，而係選擇「阻止黑暗得逞」，學習「如何能重新溝通，奮勇談論愛」。