李嘉欣頒獎給女團選拔賽冠軍，是歷史時刻。
或者，你會質疑：有冇搞錯？李嘉欣無唱過歌無跳過舞做戲無乜代表作，有甚麼資格在造星節目當評判？又不是中文朗誦學術大賽。李嘉欣靚呀。除了語言能力突出。
時光倒流到1988年，李嘉欣十八歲，參選港姐，大熱取勝。雖然大熱，也不是毫無懸念。之前兩屆，靚到似吳婉芳，或李美鳳，莫名其妙地不敵李美珊，或楊寶玲。在準決賽，角逐最上鏡小姐，李嘉欣曾經敗給陳淑蘭；到決賽，話你知陳淑蘭真係靚過李嘉欣，也不是難以想像。
結果，還是李嘉欣。那個年代，還有迷思，選港姐冠軍，要選個身材高䠷大方得體的，方便代表香港，做親善大使。吳婉芳嬌小玲瓏，輸俾高大威猛李美珊；李美鳳風情萬種，不是賢良淑德楊寶玲的對手。李嘉欣的靚，最符合港姐冠軍要求。跟手贏埋華裔小姐。自此，被推舉為最靚港姐。
對上一個港姐代表，應該是朱玲玲？朱玲玲的貢獻，是參選港姐，認識霍震霆，當選九個月，嫁入豪門。點了一盞明燈指路：選美，不一定要參選甚麼環球小姐世界小姐為港爭光，不一定要做明星做才女做影后，可以直接一點，以找到有錢人下嫁因而攀上上流社會為目標。某程度上，李嘉欣繼承了衣缽。
過程當然比較轉折。不計出現過的神奇電話錄音，李嘉欣至少花費了十多年時間，拍過好幾齣電視劇，拍過好多套電影，拍過好多次拖，才跟許晉亨先生結婚。足夠惹來艷羨目光。係，拍過的電影，多數是花瓶，多數是要個不太懂搞笑的人勉強去搞笑，但總算拍過徐克的《妖獸都市》、王家衛的《墮落天使》、侯孝賢的《海上花》、關錦鵬的《有時跳舞》，幾多演技再好的女星，也未必有以上機會。如果李嘉欣遲幾年參選，也不太可能。
李嘉欣當選十一年後，郭羨妮接了最靚港姐的棒。一如前輩，郭羨妮也跟富豪傳過緋聞，但其他傳聞男朋友，務實一千倍，例如，陶大宇。官方認證的一位，仲要係溫兆倫。可能是人各有志，郭羡妮的擇偶條件，跟朱玲玲跟李嘉欣相比，截然不同。也有可能是競爭大了，單憑美色，已不足夠橫行天下。在電視台工作十多年，郭羨妮的出路不是嫁入豪門，是北上發展，跟唔知大陸無聖誕節搞到自取其辱的歐陽震華一模一樣。賺的，肯定是辛苦錢。郭羨妮在大陸片場開工時，曾被香港狗仔隊拍到隨地大便。可以想像，拍攝日程有幾忙碌，非戰之罪。可惜，郭羨妮的靚，自此難免落入凡間。
時間再往後推。今日，靚，完全不足夠。你靚，可能得到部分觀眾支持，但必定換來另一批觀眾力踩，嫌你無才華唔夠勤力人品唔好心地唔好……李嘉欣見到，應該慶幸：好彩，以前唔係咁，就算段錄音流出，無討論區無社交媒體，形象無乜受損，我可以當乜事都無發生過，照配劉德華配梁朝偉配李連杰配黎明。換了在今日，做女星，要識跳舞識唱歌識演戲有藝術氣質識棟篤笑著衫有品味有朋友有性格下刪九千字。你話唔使靚，算，原來，依然要靚。最緊要，還要EQ夠高。我們不是選女團成員，我們選聖人。