北京管治香港管理

呢幾日張sir德江叔響濠江講了很多東西，越講越有火。睇完佢講嘢，表面好似係講濠江，但係字裡行間，必然只有針對一樣嘢：香江。

大家要記住佢講了一個訊息：就係落實北京全面管治權，充分保障一國兩制。後者係講緊一個兩制之下，濠江的自治權。要有自治之權力，前提就係要落實了北京的全面管治權。即係話有咗北大人之全面管治權先，係呀，做咗先，咁樣至有後，即係有自治權。

有乜意思？好簡單之嘛，只要香江領袖，自覺地貫徹全面管治權囉，之後呀，上面覺得落實咗，你濠江又有，香江又好，先至會有自治權嘛。有前先至有後，打死就罷就。你唔去搞好全面管治權，就真係唔好再同北大人去討論自治囉。

呢樣嘢，查實同過去五年，香江一步一步咁樣走向「北京管治、香港管理」嘅香江新管治理論，有好大之關係。經過呢五年，香江之管治模式，大概走去咗一個方向，就係響政治層面上，上面就事事過問，寸步不讓，北大人落咗柯打，香江就配合推行。一個做決策，一個做執行。但邊一方面事務係屬於香江之政治事務，就係由北大人決定。

咁就出現好多異象好難解釋。有人以為，邊個邊個局長，點解啲決定咁古怪呢？而點解香江人士見到政府官員響立法會上，解極都解唔通一啲決定呢？主要原因，就係因為呢啲決定，係由上面決定咗，香江官員按指示執行。北大人之決策，只係需要向北大人老細交代，唔使向市民交代。但係，香江之執行官員，就係面對民意代表炮轟嘛。

結果就係，上面落柯打，香江官員食鬼晒。市民唔知道，就將個責任皮波，一腳伸去依家香江政府老頂嗰度。但係，其實呢啲嘢，講真，未必係依家香江老細想做嘅，而係由上面決定嘅。

呢個我會叫「北京管治、香港管理」，上面抓政治，做決策，香江就係抓執行，做好行政管理。於是，香江高官唔係冇權，而係冇大權，佢只係睇場，收柯打工作。例如，以前局長揀副手之權力，只要係香江領袖同意都ok了，但依家呢，北大人都想知，局長之副手是誰，佢想揀邊個。係呀，北大人美其名就話，呢個係香江領袖之權力，唔會干預，但就想知道局長想搵邊個做副手。大哥，咁即係要上面批准啦，係未？

你會問，不要吹水，有乜嘢係上面之決定呢？總之大家聽落去，奇奇怪怪又講唔通之事囉。例如，聽聞有個人唔肯連任五年做落去，表面係因為佢身體唔妥。但有人話，佢當時曾經對於北大人嘅某啲做法有異議，所以試過會叫辭職添。假如呢個傳聞屬實，咁大家以後響香江做人做事，就要知道，要lobby做嘢，點都要飛多四個鐘頭去搵北大人傾囉。明未？