北方大國主席講咗有關兩岸問題的演說，梗係令到成個台海局勢打晒格仔啦。咁你又唔使擔心。上面有高官之解讀，係大老爺等得唔耐煩，要為兩岸劃紅線，反台獨啫。呢個講法，同當年處理香江事務一樣，先劃一條紅線，然後將條紅線有時劃上，有時劃落，總之劃成點都好，總之你輸我贏。呢啲做法，對付香江呢啲順民，梗係ok 啦。但係對有軍隊之English Choi，真係天賜良機。
民進黨於台灣「九合一選舉」慘敗，總統蔡英文宣布辭任該黨主席。
因為English Choi剛剛輸咗九合一大選，原本大家都以為北方大國會借勢同Korean Fish等一齊去夾死English Choi，點知北方大國主席之一席話，真係畀晒機會English Choi表演，佢一副強硬姿態回應，即刻將島內之人民連結埋一齊，一齊反中，真係出口術打嘴炮一樣可以贏番民望。
有老友響面書問，今次主席用咁嘅語氣去講兩岸，冇理由啲下屬唔知道會壞咗大事，島內人民會唔受㗎咩？唉！有時啲嘢，係好難講嘅。有時候，你做細嘅，明知老細好鬼固執，而且火氣又大，覺得自己天下無敵，能通天下震鬼神，唔通走去衝撞佢咩？如果係咁，咪由得佢發火鬧完先，然後等佢火氣過晒之後，咪想辦法補飛咯。不過，有樣嘢要留意，主席話，要同寶島之代表傾，係一個好新之想法。即係話，佢想繞過藍綠去搵其他人，例如白色力量去談判？唔知呢。下周要關心美帝之反應。
美帝國防部長馬sir走人。副手署任之時，有外電報道話，佢對軍隊文官講咗三次：China, China, China。聽落去唔出奇，不過要關心嘅係，究竟馬sir走人之後，佢地係點樣睇China。所以，貿易戰都係頭炮中之頭炮，仲係前菜之餘，依家都仲未知前菜食完未。但係美帝響郁完貿易之後，會唔會去即刻去郁其他嘢呢？美帝有報道，白宮裡面成日走來走去聽故仔嘅辦公室小助理陳伯話，侵侵嗰日話美帝撤出敘利亞，除咗真係唔想響敘利亞幫人之外，亦係要多些時間及資源全力打擊北方大國。咁後面嗰句，真係冇講出口而已。
點都要關心一下好打得。港大最新民調，響十二月中做，佢嘅支持度有大反彈，比起之前一次，大升近10%。重回近50%，佢跌咗咁耐，一次反彈得咁強，真係好勁。細心睇番，十二月初之時，政府其實冇乜新政策刺激到市民不滿，難怪民望急速反彈。所以，響香港做領袖，只要做得唔係太乞人憎，其實民望係OK嘅。不過，呢次民調就冇包括到律政司唔告上屆特首之決定。我都大膽估，下次的民調，應該會反應番呢件事之衝擊。
冇嘢嘅，貿易制裁仲未入肉，樓市就郁緊下跌但就唔急跌，市民對未來前景有憂慮不過仲未殺埋身。市民覺得做民生嘢就OK。不過，今年三月之前，就係美帝之香港政策法送去國會，小心睇路呀。 倫敦大學亞非研究學院法律系博士