Port Sick(report sick請病假)俗稱「射波」，也是一種魔鬼的試煉，特別在航空界，一試就返唔到轉頭。
未做呢行之前我都打過幾份工，請過的病假一隻手數得晒，不是身體特別好，而是因為太麻煩。首先要向上司報告，再跟不情願的同事交代。最重要係唔知點解再返工的第一日，必定要戴口罩，話俾人知自己係真心病，然後可能帶點心虛地接受同事的各種「關愛」……但呢種「繁文縟節」，到做咗呢行就解除晒。
講點樣port sick前，先講如何「墜落」。未過probation就成日聽師兄師姐講「更情」，講講吓就開始「port啦port啦」，我心諗，port咁多咪無晒「鐘錢」(我哋人工主要計flying hours)？所以開初時我無port過一日。但做到咁上下，對各種狀況開始感到心很累，包括：特別瘋狂的standby(等到地老天荒)、minimum rest pattern(等到懷疑人生)等各種奇怪的更期編排，在錢、心理與性命之間，錢自然就不算甚麼(所以愈做愈窮)。而port sick只要打個電話去crew control講低邊個想port邊班機，幾多日就byebye，一句廢話都唔會講多句，快靚正，也不需要有心理負擔，因為大把人在standby，你唔會知最後call out邊個，唔使交代，返工又無需再扮病，可以重新做人，只需交張醫生紙就完成整個程序。
不過，濫用「工作福利」當然也會有後果。聽聞一些前同事每個月平均port15日，然後，就沒有然後了。
見好就收，做任何行業都要明 。