到年尾埋單計數時候，回看今年的時裝國度，真係sorry比較多，看著BoF同McKinsey又到年尾推出一年一度時裝報告，完全看不入去，一大堆離地到不行的懶學術中性字眼，甚麼「可預計的不可預計性」(Predictably unpredictable)、「全球化再啟動」(Globalisation reboot)，講兩個算了，再講爆粗都似，都唔係人話來的，然後一大渣圖表同數字，肯定睇完明都變唔明。
撰文：Carman Chan
抄襲大軍壓境
有時我都會退一步諗，到底我對時裝的怨懟從何而來，有冇咁值得勞氣，冇統計只靠記憶及印象，今年最值得開心的時裝大事，就係玲姐的5月MET大展咁大把，然後就沒有然後了。
衰嘢就一籮籮，多得@diet_prada玩踢爆玩得不亦樂乎，全個2017年幾乎三日一小爆，七日一大爆：快餐集團抄大牌，大牌抄藝術/異國文化/少數社群，今日的我抄昨日的我無日無之，看官睇見心涼，其實也好悲哀。時裝係有創作的成分，但更多的是生意，一年出七八九十個系列兼夾時不時搞聯名乜乜乘叉叉，但消費者嘗新的胃口無窮無盡，喺社交媒體刷兩下，無新嘢睇又怕落後於人，唯有不斷想新點子推出新品應市，你係創作那位怎可能不崩潰，有時創作人向外求靈感攞啟發無可厚非，而且到底係搬字過紙定受啟發，當中條線點畫，根本就係言人人殊，被踢爆的品牌仲可以振振有詞話係致敬，真係吹佢唔脤。
時裝內容農場
一個光棍節、一個Black Friday，創下又唔知幾多個十億銷售新高，冚世界爭相報道；無情情英國王子訂婚消息，女的就榮升style icon，訂婚曝光那套outfit立即售罄；先不講又製造了幾多無謂包裝的垃圾，我第一時間便想起海中的魚又食了多少微膠粒，跟住有幾多會落進人的肚子裡；時不時有些扮深入剖析文章，說今日世代的消費者好揀擇，互聯網資訊的流通，會令大家更細心揀選適合自己的東西，不會人云亦云喎，唔該這些學者看完Black Friday的銷情，撼頭埋牆去啦。
表面風光實質壓榨
5年前孟加拉時裝加工廠倒塌事故，叫大家不能再掩耳盜鈴，睜眼看看時裝工人受壓榨的慘況，幾年下來，好像參與提高生產透明度的企業多了，年中就爆出模特兒給非人道對待的消息，只是一個casting，困在熄燈後樓梯等足6個鐘，連水都無得飲；年尾隨著荷李活性侵醜聞，一個Terry Richardson給拉下來，另一位Bruce Weber又給揪出，這些都在時裝首都眼皮底下發生，只是一兩個高級牌子停用皮草，就歡欣奔走相告，但這些因時裝之名，而埋藏了幾多殘忍不義的事，買衫的我們又有否想過？
這個Sorry State要變成不Sorry，還有好長一段路要走。走到地老天荒，走到地球停轉日，都未必睇得見。