台灣老友A難得過境香江，梗係要同佢一聚。佢都係嗰句，勸我地啲香江煩人，與其營營役役，不如退休去台灣。我話，香江係自己屋企，冇理由掉低唔理，佢笑曰：唔係唔理，係叫你退休過來休息，唔係叫你全身而退。因為香港生活費用太貴，生活品質不夠好，退休後好快一貧如洗。
我就話，咁你講得咁好，都要睇吓嗰處地方之施政品質啦，順便問吓台北市的選情。佢就真係好坦白咁講，基本上綠營都係低迷，成個台灣綠營就係政治低潮，所以真係好勁之人馬，個個都唔想選台北市以免被犧牲，所以就得一個肯出來選。當然就要問佢，明知會輸，又點解要搵個候選人出來呢？
老友A話，你有所不知矣。一個政黨如果今次因為柯P而再禮讓，咁支持者嘅票又再一次無得再投，咁樣如果柯P贏多一次，真係成個黨響台北市玩完。所以點都好，一定要出選，將支持票穩住，然後再去思考下一步點樣做。因為如果柯Ｐ真係去選總統，就真係成盤棋要有唔同之打法，千萬唔好太信一些流言啦。依家總算有個人出來選，咪由得佢出來先啦。總之綠營唔好太在意有冇勝算，但係得票率一定要排第二，輸人唔好輸陣！
老友A話，有些事情，你地香江人睇新聞又點會知咁多呢呢？好多人仲有個錯覺，以為台北市係泛藍，其實大家睇清楚的票源，並非如此。好多人都係淺綠又或者綠綠地，所以先天上綠營政黨只要做得唔係太差，其實會有人支持。不過又係咁樣好多人就有錯覺，響台北市選之時，由於佢地係都市區，一般都唔能夠立場上太激，要個樣唔好太凶神惡煞至得，呢樣大錯特錯。因為如果有人要代表綠營出選，如果佢係無辦法取得支持台獨之深綠人士之支持，佢就一定會輸。所以點都好，代表得綠營，就一定要先取獨派選民嘅支持，否則一定輸。所以響選舉之時唔好以操之過急。佢話，到時點會有地區政見會，總之到時就講多一些深綠喜歡聽之東西，一旦佢地都舉手支持，咁響工作時自然又吸收多一些票。
所以老友A都勸人，唔好人云亦云。總之依家係朋友響度打緊一場不知名的硬仗，隨時係出錢玩一次，預咗會輸，但即使選輸，票數唔好同柯P差太多就算啦。黨中央都會畀佢繼續響政治圈玩落去。因為點都好，下一次立委選舉快到，依家又係需要人才之時，只要係人才，都要選落去。選輸了台北市長，下次又去轉戰立法院，無所謂也。
我又問佢，其他地方選情如何？佢話，綠營都係差，好多陷於苦戰。不過有時都要睇對手。藍營一樣亂到七彩，所以綠營仲有些機會響選舉上維持均勢，而唔係一落場就輸晒！