「BB，點解你今日唔打電話俾我嘅？」男人溫柔地問。
「冇嘢呀。」女友答得不情不願。
「即係有嘢啦。講嚟聽吓。」男人真醒目，深明女人口是心非的古怪思想。
「冇嘢喔。」女友一副沒心機的樣子。
「你有嘅……」男友鍥而不捨。
一輸「冇嘢有嘢」的拉鋸之後。
「打俾你又點吖，你邊得閒吖，你都唔理我嘅......」女友說。
男人滴汗。呵呵呵，女友投訴致電男友時不理她。可能男人當時正在工作、打機、上廁所、睇片、見到靚女而心不在焉，對女友所說的只以單字「哦唔嗄嗯」來了事，女友聽出他不夠起勁與積極兼不想聊下去，覺得被敷衍，感覺備受冷落而不開心。受了幾次類相同的委屈後，便得出「你都唔理我嘅」這結論。
男人聽到女友說出「你都唔理我嘅」，通常會開啟自我防衛機制，反射地回應「我邊有唔理你」，表達出「我冇錯」，咁──便撩起禍端，釀成吵架了。人家的來意根本不是吵架，只是撒嬌，是溫馨提示，你你你又搞錯了！
「你都唔理我嘅」是女生最最最溫和的投訴方式，潛台詞是「你理吓我得唔得呀」，是有不滿，令她有丁點不安，卻毫沒罵人意味，只想看男友有何反應和改善，男友蠢蠢豬，竟然聽不出，唉！這時男友要檢討一下自己有否太重視打機砌模型交朋結友多於關心她。
若再不理她，她會將投訴升級，由溫婉撒嗲的「你都唔理我嘅」，變成罵你「你邊有理過我吖」。
別說女人話變就變，其實是你沒有留意而已，到時你需要更多時間更多點子更多口水來解決問題、安慰對方、令對方釋懷，與「病向淺中醫」同理，明冇？