梁振英真係佗衰家！
上台到依家，鑊鑊新鮮鑊鑊甘！搞到天怒人怨，我哋做前線多得佢唔少，一有遊行示威，就變咗代罪羔羊，俾啲人「警犬前，警犬後」係咁問候。大佬，我打工咋，唔係我選佢㗎，唔通唔撈咩？你養我一家大細呀？
928仲大鑊！康文署擺明靠害，啲學生喺政府總部大草地罷課，嗰度正宗心曠神怡啦，又唔阻人，你咪由得佢囉！做乜鬼批啲左仔攞咗個場唱《男兒當自強》 吖？！搞到啲學生仔逼晒去添美道。大佬呀！啲學生仔反國教，當正嗰個公民廣場係聖城麥加，你又加圍欄唔俾人入，你一係加到赤柱咁高先得㗎！啲靚仔又爬又衝 咪入晒嚟囉，我哋拉人封艇咪搞到佔中臨時爆發囉！
部門啲「上大人」個腦真係生喺patpat度，班友臨時轉場去佔「鐘」，求之不得啦！大草地全維港景，完全唔阻街坊好友，應該整個歡迎牌，加個BBQ爐， 邊食腸仔，邊睇國慶煙花都仲得！做乜鬼咁好大喜功，即日就封晒啲入口，唔俾人入呀？「上大人」真係「智慧過人」，諗住入面人少，落閘容易清場。X！阿蛇， 你用下腦啦(雖然係patpat度)！你唔俾人入，塞係出面咪仲大鑊囉！
出面條告士打道、夏愨道幾X長呀！全個金鐘都唔知有幾多萬人，我哋前線得幾千人，守得金鐘嚟，守得住中環、灣仔咩？
各處防線崩潰，最後咪殺到添美道我哋個位囉。出面幾萬人，入面又係學生，我哋得百幾友夾喺中間，個個伙計隻腳震過貓王！
其實咁嘅形勢，老虎蟹都「戰述性撤退」(Tactical Retreat 俗稱「走頭」)，但上頭死要面，要我哋死守，胡椒噴霧搞唔掂，咪出埋催淚彈囉！諗住佢哋會散，點知又返嚟，見人行近啲指手劃腳，驚起嚟咪又整多粒等佢哋埋 唔到身，咁咪愈搞愈大鑊囉！最後群情洶湧，愈嚟愈多人出嚟，仲四圍唧，金鐘、中環、灣仔、旺角咪全面淪陷囉。
最慘係返到屋企，一向當我係偶像嘅阿仔仲鬧我，話我「炸」佢啲手無寸鐵同學仔。唉！我認，呢鋪係衰咗，但我都唔想。最衰都係梁振英，希望個瘟神快啲嘴痛落台啦(橫掂佢張嘴淨係識講大話)，唔好再佗衰家，XX！
後記：聽講嗰晚有幾個伙計喺紅十字會對開俾幾百人圍住鬧爆，居然毛都無少條「戰述性撤退」(其實呢招係work㗎)，簡直係環球警界大奇蹟啦！問心，呢啲市民點打得落手呢？
E-mail：[email protected]