香港會議展覽中心30周年，董事總經理梅李玉霞(Monica)昨日與傳媒飯聚就話，諗緊送咩嚟慰勞員工，皆因會展有今日的成績都係靠佢哋。佢話上次25周年時，佢哋向每名員工派發千元鈔票，因為銀紙上面印有會展圖案，所以別具意義。
講開員工就令人聯想到會展業人手緊張，會展本身都有方法留住人才，Monica話，自己喺會展已經24年，都係從低做起，明白要令員工用心為公司努力，作為管理層都要將心比心，佢舉例話，好似派bonus咁，已經喺冬至前出晒，仲唔止13個月糧㖭，希望員工可以安心過個肥年。講開又講，佢話公司仲會出資俾員工進修，好似佢咁，都係靠公司資助而完成幾個學位㗎！
講講下，佢仲話會展設有員工飯堂，提供一日四餐免費膳食，而且餐單主要參考員工意見，Monica話佢試過想加一道自己好鍾意嘅菜式，點知被否決咗！係咩菜式？梅菜扣肉是也，員工認為太肥膩，唔適合噃。Ray都估唔到身形瘦削嘅Monica會咁重口味。