星期三(21日)冬至，俗語有云「冬大過年」，家家戶戶都會團聚吃頓豐富晚餐。不過，對於基層長者與露宿者嚟講，為求溫飽，對餸菜沒有奢求。喺深水埗經營燒臘飯店、每周皆向基層義贈飯盒嘅「明哥」陳灼明，就會喺冬至前一晚派發加餸飯，背後仲有蔡瀾捐出10萬元支持，呢個冬天真係加倍溫暖。
蔡瀾與明哥已經唔係第一次合作，當蔡瀾知道明哥多年善行後，不時樂意出手襄助，繼為飯店招牌「北河同行」及慈善籌款活動嘅菜牌題字後，今次就捐款。明哥亦非常感激蔡瀾的支持，適逢冬至將到，明哥於是決定以蔡瀾名義，喺冬至前一晚派發300個加餸飯盒予基層長者，餸菜除咗兩肉一菜外，仲特別加入應節食品包括蝦及冬菇等，並會喺當日派發500張飯票給基層長者及露宿者；至於餘款則將會定期再以蔡瀾名義派發飯盒及物資給基層。
另外，明哥喺本年度成立獲政府認可嘅「北河(明哥)慈善基金」，銀行戶口已獲批核，市民如想捐款支持，可存入中國銀行(香港)012-352-1-039658-2，多多益善，捐款超過100元可申報作稅務扣除。
投身傳媒工作多年，由市場研究做起，一直與公關、廣告、新聞界結下不解緣，心境永遠青春。