前幾日上京，約了一個在當地讀研究生的好友見面。求其去間coffee shop扮中產(仲貴過星巴巴)，佢開頭第一句就問我香港發生咩事，話所有資訊都係靠香港家人cap圖send俾佢先知少少。我問佢唔係可以翻牆嗎？佢話612嗰幾日翻牆軟件全部唔work，根本唔知發生咩事(根據不同大陸port的比較，京城牆確實最難爬，就算酒店都係斷斷下)。雖然身處公眾地方，但喺大陸講呢類話題真心會自我審查。
「嗱……微信宜家錄緊音」我以笑遮掩我的淆底，佢一句「驚X咩！」chok到我無地自容。一個仲要住幾年的人都唔驚，我堂堂一個香港自由西竟然淆到如此地步，究竟係點樣的白色恐怖會令人咁驚，我問自己，之後喺香港傾偈會唔會都變成咁？一陣行出去會唔會俾人「塔返去」飲多杯？仲返唔返到香港？公司會唔會保我？
店舖環境清幽，大家都低頭做自己的事，無人理會我地，有一瞬間唔記得自己喺北京，搭程車就係天安門……就咁度過了一個心情複雜的午後。行出咖啡店，下著微雨，感覺清爽，諗起首歌：「再多悲壯亦能笑一笑吧，唯願我從此不再害怕。」 肥、毒、宅的空中服務員。