生活所謂衣食住行，喺里斯本食完葡撻，當然係要諗下仲有乜嘢玩，以幫助消化。有人瘋狂shopping，有人單鏡攝影，有人坐車浪漫，總之就係放假，唔會好似係香港咁怕咗出街行。
中譯名里斯本，真係意、達、雅。不論意境、感覺都係一讚。Lisboa依山而建，道路起伏蜿蜒，有少少似葵涌的石籬、石蔭同安蔭，道路甚是曲折。可幸山城內之樓層矮，望到天，唔算迫狹，生活寫意。
烽火漫天走出風格
里斯本於公元前205年開始由羅馬統治，隨即升格為市，命名「Felicitas Julia」(祝賀凱撒之意)。自476年西羅馬解體之後由蠻族(Barbarian)入侵，中間8世紀就被摩爾人(Moors)統治，至1147年被十字軍奪取後，1256年才正式成為葡萄牙首都，真正葡京的誕生。
作為歐洲面積最細嘅城市，要喺咁多旅遊景點突圍，全靠獨有的生活風貌。不過縱然風景美麗，作為遊客得嗰幾日，最重要都係在於交通方便。要平得嚟又要舒服，又唔怕被時間所限，鍾意隨心上車落車，又唔會等得耐，想點睇就點睇，當然係遊電車河啦！
色彩繽紛走出燦爛
里斯本電車唔似得香港只得一條東西大直線，其網絡四通八達覆蓋較廣。尤其單層電車重量較輕，靈活自如地攀山落斜，唔似得香港嘅雙層電車，最激都係只得康山落太安樓一段。不過講到靈活，除咗唔俾錢真正掹車邊嘅順風客之外，都唔夠車上嘅扒手敏捷，興奮觀看長街窄巷，一個不留神真係唔謊唔難忘。
其實香港第一代嘅電車正係單層，於1904年英國散件引入26部，相信大家都未坐過。睇相兩者外形極度相似，加上圓渾可愛嘅黃色外衣，在低密度嘅建築群中走過，真係勁有活潑feel。而咁多條路線，當然首選28號。佢遊走城內Alfama、Bairro Alto、Baixa同Chiado呢幾個經典景區，穿梭地方歷史以及無敵風景，坐過至叫做真正感受過里斯本。
嫌唔夠激，仲有特製專門喺勁斜直線路軌上嘅坡道纜車(Funicular)，不過只得三條路線，分別為Bica、Gloria同Lavra，而車廂都係木製同埋黃色，不過個站匿得好埋，同過程有啲沉悶，唔及得金鐘上山頂咁精彩，都係算罷啦。
無懼眼前走出黑暗
人生有如28號電車嘅奇妙旅程，走過曲折的石屋古瓦，就會發現天空之蔚藍。功課壓力大到想死，書外大地任我縱橫。遊一趟電車河，筲箕灣漫遊西環，食埋個葡撻，生活淡然唔使十蚊，咪當去咗里斯本囉。