睇見台灣政局真係好笑。成件事好似得一個人去選，因為English Choi響不同的民調都領先緊。仲有大概三個月就投票，咁除非真係有大事發生，搞到English Choi跌票，否則English Choi就真係好有機會連任。究竟English Choi人氣係點呢？就睇下佢落區之時，當區嘅民進黨立委參選人，係咪願意同佢合體囉。
蔡英文總統尋求連任。
如果總統候選人之人氣勁，咁每個立委參選人一見到總統候選人就想攝位影相。按台灣的選舉語言，合體可增人氣，仲要四圍貼。呢啲合體呢，唔似香港咁hea，左邊係立委候選人，右邊係總統咁樣門神式海報。合體係需要一張，立委同總統握住手或高舉雙手的相片。你試想一下，呢類照片係一定要兩個人去studio影相，冇得P相。咁一個立委參選人要同總統影相，就要支持總統嘅路線啦，係咪？如果一個參選人又唔支持總統路線，一來已經冇法子響黨內初選勝出，二來又冇辦法去搵總統影一張合體照，咁選民都會問，呢位立委參選人同總統候選人係咪有心結。就係咁樣，只要總統個勢夠強勁，立委就會自動埋位支持總統，成為「英派」。響呢種政治文化下，總統就可以掌握住權力，決定邊位可以選立委了。
咁Korean Fish呢？如果想知道佢嘅人氣，大家去台灣旅行之時，不妨數下有幾多政客同佢有真合體照呢？但係，又有人開始講，唔好睇小Korean Fish，因為佢非常善於用庶民嘅語言，挑起選民的親切感及認同感，響一啲比較窮嘅地方，仲係好有吸引力。一旦Korean Fish真係發揮魅力，民調就可以反彈。所以，我地呢啲花生友，除非真係好熟悉當地政治，否則就真係唔好亂估。
英帝又如何呢？當大局底定，成個國家都向著國會選舉之後，就係一連串之合縱連橫。保守黨之最大危機，反而係佢地最保守嗰一翼，基本上就俾脫歐黨派奶嘴哥(Nigel Farage)食晒。加上部分保守黨內之溫和聲音幾本上都散晒，如無意外，即使保守黨表明唔會同奶嘴哥結盟，但一啲立場接近的選區，如果兩雄相遇，一般都係益對家，即係工黨。英帝波叔今次大選，係保守黨生死攸關，大家睇住佢點樣搵食啦。
美帝總統選情梗為激烈啦。早輪有報道話，原來民主黨總統候選人初選之中，已經係三頭馬車之格局。依家領先嘅係溫和派舊電池拜登，但近來似乎都係平穩咗。排第二的是立場最激嘅桑德斯，至於排響第三名嘅，就係沃倫。響民調之中，拜登平穩，一般就覺得佢就真係太老了，佢仲有冇能力擔起整個選舉工程，令人懷疑。至於民調第二嘅桑德斯，年紀係老，不過佢地啲粉絲好想佢發光。因此，第三位的沃倫有機會後發先至，暫時發現，捐錢俾佢做選舉經費的人數及增長速度都好快。睇個勢有機會發圍。
倫敦大學亞非研究學院法律系博士