阿弱驊，我被人叫做奶媽，皆因當年我要罩住吳得掂，佢確唔掂，但我發夢都估唔到你仲大鑊過佢！
我讀書年年考第一，港大畢業就做官，Best of the best，宜家仲做埋阿一，身邊嘅，一定要係反對「精英主義」的精英，我以為你係，點知你一埋位，未立功，先惹禍，搞壇大龍鳳，我真係被你累死呀！
你話自己警覺性不足，梗係錯啦，唔係「不足」，係「完全無」呀！你知道返新工，一係賣樓，一係填窿，再唔係搵嘢遮住個地窿嘛，咁都唔曉？
咩「因公忘私」？我見你咁講，唯有幫你死頂，你阿姐我呀，朝五晚十二，我咪仲忙，咁我係咪喺禮賓府地底起個十三陵出嚟呀？
唔知係僭建？閂埋門仲當我白痴，正常人睇樓見到個咁嘅地宮，都會問有無入則啦，除非你盲咗啦，你返工前無驗眼咩？咁大個窿，盲咗都會差錯腳轆落去啦！大律師，講嘢！
你咪以為我撐你呀！我早幾日被班友問到面黃，答嗰幾句「你今日坐得喺度，梗係信你啦」，即係如果你聽日起身，我就信你都傻啦；仲有嗰句「如果呢個係事實，就唯有係事實」，即係你都講到咁，我都無話可說啦；最後嗰句「熱廚房升溫，我都唔知仲搵唔搵到人做品格審查」，講白啲，如果我搵到人頂你，仲使幫你死雞撐飯蓋？
本來搵你幫手搞國歌法、廿三條呀，你搞到咁，未出閘，先跛腳，點搞呀？仲有個高佬，問你嗰七條問題，最難答嗰條係，究竟你買樓時嗰個律師有無提你間屋有僭建，佢有責任了解，如果無，佢就失職；如果有，即係你講大話，仲大鑊！我都唔知自己仲頂得你幾耐，你好自為之啦。