細細個第一次睇《殭屍先生》，印象最深當然就係啲殭屍有幾恐怖，但大少少再睇，你就會被錢小豪吸引，心諗有冇搞錯呀嗰幾場戲，佢啲斛斗翻到咁靚，身輕如燕，腳尖點一點地，就已經騰雲而起，完全唔使借力，最重要係表情舉重若輕，毫不費勁，仲簡單過打機狂撳Ａ掣，係後來大個啲認識咗Air Jordan，否則，我諗我都會叫小豪哥做Air小豪……
熒幕上嘅小豪哥年輕時夠charm夠靚仔，到咗呢個年紀，因為人生經歷，嗰份佬味慢慢滲出嚟，Man得嚟又多咗份成熟穩重，難得嘅係佢嘅豪爽俠氣仍在，對後輩，對香港電影，始終有住一份牽掛同感情，所以當我冒昧搵佢，膽粗粗響budget唔夠嘅情況下都以誠意搭夠，邀請佢為我人生第一次做導演嘅電視劇擔任單元主角嗰陣，佢睇完故事，一口答應，嘩，嗰一刻，我幾想喺西貢碼頭感動大嗌，小豪哥果然係小豪哥！多謝您啊！
佢仲話睇完我寫嘅佢個角色好感動好期待，講真，我其實一直都覺得小豪哥可以演到更多更好睇嘅角色，但奈何殭屍形象太深入民心，有時反而限制咗投資者或者導演觀眾對小豪哥戲路嘅想像力，所以我先大膽估計，到咗呢個年紀，小豪哥最想演嘅，其實唔係咩天師殭屍，而係更有血有肉，勇敢面對自己，樂於傳承，一個好爸爸嘅角色………
時代在變，昔日小子如今已經成為宗師，由以往膽正命平唔怕死飛車，到依家享受陪仔仔踩單車，甚至將來睇住仔仔落場片車，人生就是這麼一回事。
感謝小豪哥，你哋將會喺我個電視劇入面，見到最charm又最不一樣嘅小豪哥。
