艾菲爾鐵塔外觀最初由Maurice Koechlin及Émile Nouguier所設計。
「不必攀登巴黎塔尖，詩般風光經已在前。今夜、明天，願痴纏！從前如風聲飄泊，現在但願能共你編，千億晚、千億天……」
中學時期，一首浪漫的旋律，一副清澈的嗓子，有一個新晉歌手，一曲叫做《巴黎塔尖》，令到法國的無限景緻彷彿活現於眼前。唉，不過講就係咁講，其實都冇去過，最多都係透過電視節目簡單的介紹嚟去虛構，滿足一下青春期的浪漫思考。
用飯觀光每層愈高愈貴
其實真係要攀登，塔尖收費都幾甘。因為艾菲爾鐵塔(La Tour Eiffel)分為三段樓層，一、二樓係餐廳，三樓則為觀景台，遊人要上塔尖都只能搭。餐廳分別高58米及再double的116米，要上嘅話都仲可以行樓梯，不過只限第一層免費。觀景台離地276米，而全塔就高324米，有如一般80層樓左右的高度，於1930年前曾經係全世界最高嘅建築物，維持咗成41年，不過依家仍然係巴黎最高的地標，法國境內則計為第二。
公開投標背後預早內定
鐵塔建於1887年1月，1889年3月完工，趕及於5月為「第11屆世界博覽會」(當時叫World’s Fair)開幕典禮剪綵之用，亦用以紀念法國大革命100周年。係咪因為咁而選擇以熟鐵為主，則不得而知。不過這紀念館念性的建築物定意不一定是鐵塔，而鐵塔最初其實亦唔係呢位金屬結構專家艾菲爾(Alexandre Gustave Eiffel)設計，係佢向Maurice Koechlin、Émile Nouguier及Stephen Sauvestre買入設計圖。直到1886年，通過內定的公開競賽，鐵塔工程正式宣布上馬，劇本一早寫好，反對冇用，而通過合同，政府仲提供150萬法郎的建築費補貼。由展覽至往後20年期間，鐵塔營運權都歸艾菲爾本人。免地價、有補貼、再有營運權，真係難分官商勾結或是精明投資。
偉大工程難免人人歡迎
鐵塔由7,000噸熟鐵及250萬粒拉釘(鉚釘)連接固定。熟鐵較軟，韌性和延展性較高，框架結構與同樣出自艾菲爾設計的紐約自由神像近似。而平方的四腳基地，每邊為125米，分別朝向東南西北方位。雖然今日鐵塔已經係巴黎甚至法國象徵，但當年曾經係一個爭議話題，一份由一班藝術家提出的《Artists against the Eiffel Tower》請願書被送到工程部長和博覽會專員，可惜回覆指項目已經決定，工程已在進行中。好在當年他們沒有強行闖入地盤，要不然可能在完成社會服務令之後要再坐監。
被譽為「短篇小說之王」的Guy de Maupassant，據說經常在鐵塔用餐，原因係佢唔鍾意鐵塔，而嗰度就係唯一睇唔到鐵塔嘅地方。不過為爭取2024年「奧運」同2025年「世界博覽會」主辦權，百年鐵塔將會進行大翻修，尤其日曬雨淋幾個鐘頭的排隊苦況將會改善，到時攀登《巴黎塔尖》，不用等到明天如風聲飄泊，不過入場費就真係千億天了。
