中環政經圈子噚日嘅熱門話題，並唔係邊隻新股熱賣，亦唔係公屋究竟有無封頂，而係久未公開露面嘅城中首富李嘉誠現身快活谷馬場，而且仲孖住孫女齊齊見報，認真罕有，怪不得唔少中環友都嘖嘖稱奇。
話說噚日有報紙登咗誠哥同孫女李燕寧去馬場嘅合照，聽講誠哥見到都嚇咗一大跳，其實佢只係諗住趁禮拜日帶未去過馬場嘅孫女去快活谷睇馬兼食飯，兩爺孫享受一下家庭樂，根本冇約任何人，點知成為新聞焦點，竟然有成八十幾萬點擊率兼洗晒板，認真誇張。
誠哥一向低調，亦甚少談私生活，但又難怪嘅，佢一舉一動都受人注目，加上21歲嘅李家長孫燕寧已經亭亭玉立，富豪第三代多人留意，亦係好自然嘅事。