早排有張相影住由倫敦返香港嘅客機，好似拍緊生化危機。完全表現到香港人喺時代交織下所產生的靈活變化。講真，啲客著到咁，作為乘務員都表示好安慰，因為我地無辦法著保護衣返工。所以大家防範意識高，你好我好。而且機艙乾淨程度大家都知，無人會信skytrax，唔怕。機艙最污糟嘅地方可能大家都睇過唔少文章介紹，但非常時期，肥珍同大家睇下邊度會比較上乾淨啦。
以前我哋返工一檢查完安全用具同逃生設備，就會開始準備要service嘅用具，set茶包、數餐、chill酒等等。宜家做完檢查工序就開始機艙消毒大作戰。戴兩層手套，將我哋自己嘅位又噴又抹上萬次。因為清潔團隊無人會理我哋嘅位，所以如果大家唔小心掂到，或者要借力扶下，係安全嘅。
之後，我哋會消毒galley(機艙廚房)同廁所，用噴霧起勢咁噴。特別係近galley嘅廁所，一定比其他嘅乾淨，因為我哋都會用，大家綁埋同一架機，所以一定會額外照顧。明白大家如非必要都唔會用廁所，但如果忍無可忍，呢個貼士位可留意。
而一啲大家都無察覺嘅污糟位，可能仲衰過廁所，就係seat pocket。好多客會將抹完口鼻嘅紙巾塞落去，而清潔員都只係清理表面見到嘅嘢，塞太入嘅鼻涕，會隨時間而永久留存。但我知唔少客會習慣地將電話證件水樽擺落去，咁無論著幾多層保護都會前功盡廢。喺度俾個忠告大家，唔好百密一疏，一Q清袋呀！